Leif Marottinnekes en Marotte,
Veer höbbe gounsdig aafsjeid genómme van oze Grootvorst Ben I Bartholomeus. Ein emotioneel moment veur jeder dae de Vastelaovend in Zitterd leif haet. Mit Grootvorst Ben verleize veer eine richtige vereinigingsminsj mit charisma en dae zich door de jaore haer in mènnig hart haet laote sjleite. Dit maak zien aafsjeid extra emotioneel, mer daoróm neit minder sjoon.
Bie ein indrukwèkkende en prechtige mès höb ich same mit anger aafgevaerdigde van de perpluuj Grootvorst Ben nao ’t altaor mage begeleie. Ein biezunjer en spisjaal moment óm dit veur zo’ne biezunjere minsj es Grootvorst Ben te mage doon.
Immens resjpek geit oet nao Bart en Michiel die hun perseunlikke weurd euver hunne pap mit ós höbbe gedeild. Ouch de weurd van Grootvorst Ben ziene brouwer en Phil-prizzedent Paul Paques höbbe eine ónoetwisbare indrök op mich gemaak. Sjus wie de muzikaal biedraag van de muzikante van de Philhermenie mit in ’t biezunjer “Hoog ’t Rood, Gael, Gruin.”
’t Eine indrökwèkkende moment volgde ’t anger op. Wae de erehaag in ein langgerèkte Daeke Thijssensjtraot haet gezeen, kènt allein mer konkludeiere dat Grootvorst Ben ein zeer gewaardeierde, gerespecteierde en geleifde minsj is gewaes. En noch ummer. In grote getale koume lede van De Marotte Zitterd, Auw Prinse, Senaat en ‘t Optoch Kommitee same óm mit nog mee luuj van Zitterd en ómsjtreke ein lètste eer te bewieze aan Grootvorst Ben. Dit alles maakde ’t aafsjeid van Grootvorst Ben waerdig en óm noots mee te vergaete.
Ich blief Grootvorst Ben en Imelda eeuwig dankbaar veur de väöle sjteun en gouw advieze die ich van hun höb mage óntvange saer mien aantraeje es Vorst Marot.
Imelda, Bart en Mariska, Michiel en Lilian en de kleinkènjer, gans väöl sjterkte gewunsj mit ‘t verleis van eure man, pap, sjoonpap en opa.
Vorst Marot Jan I Janssen
