Zo dat waor ‘m dan en gans geplök…. of jao, bienao gans. Ich haw gehaop dat ze mesjiens die extra kilo’s ouch d’r aaf hawwe geplök, mer goud.
Noe is ’t weier geweun Nick of jao nog neit gans… wach effe ich bèn zo trök.
[Nick deit zich sjnel ómkleie nao optochhal kleier]Kiek dat is baeter, noe weier echt gans geweun Nick.
Waat höb ich ein jaor d’r op zitte, en waat höb ich genaote van alles waat Zitterd ós te beie haet.
Noe höb ich èns van gans kortbie kènne mitmake waat vastelaovend inhilt. Ich dach namelik dat ich al volledig begreep waat vastelaovend waor mer es geer zeet waat allemaol georganiseierd wurt veur jederein, dao gónge mich de ouge van aope. Zo väöl klein dènger mitgemaak waat echt fantastisch waor veur aan te mage biedrage.
Ich höb al dèkser gedruimp van dit moment zelfs van wie ich nog Prins moosj waere… vraog mich neit wooróm dat weit ich ouch neit. Wilde dit op ein sjpeciale meneier doon, en d’r zit zelfs nog ein leidje in maaaaar… maak uch neit drök, ich gaon neit zènge, want dat kèn ich ech neit.
Noe vraog geer uch mesjiens aaf wooróm dat ich hie in de halkleier sjtaon en dat is neit geheel zónger rae. Mich liek ‘t namelik sjoon óm ’t boewe van eine wage te vergelieke mit wie de vastelaovend is opgeboewd. Óngeveer in zo’n 7 sjtappe.
Dao gaon v’r: eine vastelaoveswage boewe begint mit graof iezer profiele, dat is de kaer. De kaer is de femieje plus de Vorst en Sjra.
Es eesjte Mam, danke veur ’t fantastisch prinsepak wo ich in höb kènne sjtraole, veur klein speciale momente en de sjteun die daag.
Pap en Wies, danke veur alles waat geer muigelik höb gemaak in mien Prinssjap, natuurlik ’t prinselik palies en de pins die ich höb kènne oetdeile.
Dan Ellen, danke veur de sjteun in alles óndanks dat dit ganse neit ech dien dènk waor. Veur ’t zörge veur thoes weier te kènne lanje nao lang daag en de gouw zörg.
Ich hawt van uch allenej!
Wiejer Vorst Joep, ja wat mót ich dao euver zègke, ich höb dich op ein gans anger meneier lere kènne noe. Danke veur de kans dat ich dit alsnog höb mage aafmake, de gouw gesjprekke wies weurd, de lach en de traon. Ich höb goud kènne geneite same mit dich van de grote en klein dènger.
Dan tensjlotte Sjra, ouch waal baeter bekènd als Sjraversjtappe of Sjrapedia. Deze man deit zoväöl en wit zoväöl, dat is neit mee normaal. Euveral wo se haer geis dao kènt hae waal get euver vertèlle of haet ‘r ein verhaol euver. En es te urges dreigs te laat te kómme, dan kumps te esnog oppe tied want dae wage kènt ummer heller. En ’t is neit meer es terech dat-s dich Commandeur in de Orde van de Pappegey bès gewore. Danke allebei!
Zo dan gaon veer nao ’t volgende deil, Betóniezer. Dat zörg veur de vórme van de wage en dus ouch de vastelaovend. Dènk aan Marotte, en in mien geval de Sjnaake mer d’r zeen nog väöl meer clubs en vereiniginge die hie bie heure mer dan wurt ‘t dankwoord erg langk.
De Marotte, eine gróp die alles veur dich regele, doon en zörge dats te nurges get te kort kumps. Echter koosj ich noots wènne aan ’t feit dat jedere keer es se nao de wc mós emes diene Scepter wol vashawte van die club en mit de wc op leipe… Nae flawwekul ‘t zeen sjtök veur sjtök toppers, danke veur alles!
En dan natuurlik mien boewklub de Sjnaake, waat höbbe die mich fantastisch opgebrach en gesjtraolt, gefees, en gehólpe wo ’t koosj, danke!
En in ’t speciaal sjötterie Sint Lambertus Broukzittert veur ’t opbrènge en de vate laeg te make bie ‘t aope hoes, danke!
Veer gaon weier ein laog wiejer. Dit is ’t kippegaas.
Superväöl klèndere vereiniginge, klubs, vrunjegroepe en nuim mer op die vastelaovend make en zörge dat d’r euveral get te doon is. Eine sjone optoch gehad door allemaol van dit saort clubs en ouch nog eine extra lang doerende door ’t Optoch Kommitee, danke dao veur😉.
Mer ouch aovende en middige mit gehandicapte en seniore, dementeierende luuj. Waat veur mich heel biezunjer waor. En veur de luuj die dao veur zörge danke!
Nao ‘t kippegaas kómme v’r oet bie papier, dit besjteit oet 3 laoge dus… es eesjte de gezètte.
Zeen dat dan es 3 generaties.
Noe gaon ich oet van de aw gezètte want ’t geit euver de awdste generatie wo ich bèn gewaes.
De seriore luuj die al mekkelijk 60-70 jaor trök vastelaovend höbbe gevierd en gemaak. Die d’r veur gezörg höbbe dat veer vandaag de daag nog ummer dit sjoon feeske kènne viere. Danke daoveur!
Vervolges kómme v’r bie de ‘’reclamebuikskes’’
Heel simpel gezag de huidige generatie wo ich zelf ouch ónderdeil van oetmaak. Wo ich zelf heel greutsj zeen, dat d’r sjteeds meer jóngere take euvernumme van de get awwere generatie. De vastelaovend goud kriege aangeleerd en de tradities in ere wille hawte.
Ten sjlotte es lètste van ’t papier is wit papier.
Hie mit bedoel ich de toekómstige generatie, alle kènjer die, op dit moment ózze sjone vastelaovend mit de paplaepel kriege ingegaote en bie ein kerkes project zitte óm haopelik in de toekóms ouch wageboewesj te kènne waere zodat ós ”ras” ouch neit oetsjturf.
Dan es allerlètste de verf. Dat zeen veer allenej biejein die same de vastelaovend kleure mit zowaal ’t make es consumeiere d’r van en ós sjoon tradities in ere hawte
Danke daoveur!
Boete dees laoge zeen d’r nog 2 specifieke luuj/clubs die ich gaer wil bedanke.
Es eesjte jederein van Radio Nónnevot die höbbe gezörg veur eine sjone trökblik mit de podcast „Wo is Nick“.
En es lètste emes die ich helaas neit in persoon kèn bedanke mer die nao mien idee waal aaf en toe veur eine duuj in de rök haet gezörg én veur ’t sjone waer. Veerle danke, ich haop dat se ouch mit genaote höbs vanaaf dien zomerpalies.
[ ’t leidje ‘Zing mir nao Hoes’ van Kasalla is gesjpeeld gewore ]Tensjlotte, veur de lèste keer, wil ich uch gaer ‘t volgende mitgaeve mer dan sjus get angesj.
Mit ein lach en ein traon gaon veer weier de henj inein sjlaon.
Veur alle luuj die vastelaovend make en d’r veur zörge dat Zitterd mit die daag blif krake
Belaof ich troe, ouch zónger miene scepter euver te wake.
Leif luuj danke veur alles, veur uch pak ich mien lasjkap aaf.
