Ónlangs haet ós ’t druivige nuuts bereik dat Ridder in de Orde van de Pappegey Baer Smit aafgeloupe vriedig is gesjtórve.
Mit zien sjterve verlus Zitterd eine zeer gewaardeierde en gerespecteierde minsj.
Es jóng van de Pötsjtraot is Baer opgegruid mit leifde veur Zitterd en ziene eeuwenawwe vastelaovend. Hae is zien laevelank eine gangmaeker geweas en waar ummer van de pertie. In 1962 waar hae ein van de oprichtesj van ’t eesjte Zittesje kapelke: ’t Hermenieke. Hiedoor koosj hae meziek en sjpas bie de luuj brènge; en dao dreede ’t óm bie Baer.
Veur De Marotte haet Baer biezunjer väöl beteikend: jaorelank is hae es redactielid bie De Pappegey betrokke gewaes. Hae waar ein gerespecteierd lid van de redactie en noum ummer ’t interview mit de Sjtadsprins veur zien raekening, allein of same mit ein angere redactielid. Me deig noots tevergaefs ein beroup op Baer en ouch aan de lèste Pappegey haet Baer nog zien biedraag geleverd mit de controle van zien geleif Zittesj. Es me häöm get sjikde of vroug dan wos me dat ’t neit lang zou doere pès dat ‘t retour koum. Baer haet ouch mènnig Sjtadsprins biegesjtange mit ’t sjrieve van zien motto en hae zoug d’r op toe dat dees hooghede ouch ummer goud Zittesj kalde. Eine sjpoedcursus Zittesj beheurde dan zeer zeker nog tot de muigelikhede.
Veur zien verdienste veur de Zittesje vastelaovend is Baer in 1999 benuimp tot Ridder in de Orde van de Pappegey.
Baer, veer zulle diene humor en wies weurd misse.
